Den luna di sèptèmber Liseo Boneriano lo inisiá e di dos edishon di e programa edukashonal di Qredits Boneiru yamá ‘BeYourOwnBoss’. Un total di 40 studiante di grupo 1 i 2 di MAVO, HAVO i VWO lo partisipá. Tantu nan komo nan mayornan ta hopi entusiasmá pa nan partisipashon i lokual nan lo logra via di e prorgrama. ‘BeYourOwnBoss’ ta diseñá pa yuda e studiantenan haña konosementu di emprendementu i deskubrí nan abilidatnan empresarial.
‘BeYourOwnBoss’ ta un inisiativa di Qredits i tin komo meta pa stimulá emprendementu bou di studiantenan. Durante e programa e studiantenan ta haña e oportunidat pa desaroyá nan abilidatnan empresarial i amplia nan konosementu tokante empredementu. Diferente topiko tokante emprendemnetu lo keda tratá. Pensa por ehèmpel riba deskubrimentu di nan propio abilidatnan empresarial, trahamentu di un análisis di konkurensha i un plan finansiero. Tambe nan lo duna kontenido na un idea empresarial hasiendo uzo di un ‘Business Model Canvas’. Na final di e programa e partisipantenan lo presentá nan idea den forma di un ‘pitch’ i nan lo risibí un sertifikado.
Dia 11 di sèptèmber último a komparti informashon tokante di e programa ku e mayornan di e studiantenan ku lo partisipá. E lèsnan lo kuminsá dia 19 di sèptèmber i e programa lo dura 8 siman largu. E studiantenan lo keda repartí den 3 grupo pa fasilitá komunikashon i partisipashon efektivo. Mener Sullivan Chin Fung Chun, kende ta un Qredits Coach i tambe un empresario, lo ta e dosente prinsipal di e programma. Apart di e lèsnan den kual lo tratá e topikonan ariba menshoná, lo bai bishitá diferente instansia relevante i empresarionan na Boneiru. Orco Bank komo e partner prinsipal di e programa ‘BeYourOwnBoss’ tambe lo fasilitá un seshon tokante di maneho di sèn i produktonan bankario ku e studiantenan por hasi uzo di dje pa manehá nan finansas personal i empresarial.
Liseo Boneriano su enfoke ta pa nan studiantenan por siña proveé pa nan mes na un edat yòng i asina redusí e preshon finansiero ku nan hogar por ta eksperensiando. E programa ‘BeYourOwnBoss’ ku Qredits ta fasilitá a prueba di por aportá na e realisashon di e meta aki. Pa e motibu aki e skol lo sigui duna su studiantenan e oportunidat pa partisipá na ‘BeYourOwnBoss’.
E programa ‘BeYourOwnBoss’ te aktivo na Boneiru for di 2021. Na promé instante e programa a keda ehekutá na MBO i despues a keda introdusí na Liseo Bonriano tambe. Mas informashon tokante Qredits Boneiru i ‘BeYourOwnBoss’ riba www.qredits.com. E wèpsait di Boneiru ta disponibel na papiamentu i na hulandes.
BròKèS 93.5 ………… Skuch’é!
.png)
Comments