Den un di su edishonnan anterior e korant BONERIANO a trese dilanti ku tin diferente iregularidat tumando lugá pa loke ta trata situashonnan ku ta un infrakshon, pues un situashon ilegal, pero mientrastantu pa añanan largu a bira manera normal.
E korant a menshoná ku for di komunidat ta skucha konstantemente e gritu ‘lei pa un, lei pa tur’ i ku e pueblo ke mira ku ta aktua kontra tur iregularidat i no kontra un grupo so i pio ainda si e grupo ei ta bo kontrikante polítiko.
Pa ilustrá esaki a mustra riba un iregularidat den Kaya Albert Engelhardt.
Mester mustra sinembargo ku e situashon na Boneiru pa loke ta trata e desaroyo espasial ta bastante kompliká i di sumo preokupashon.
Na promé lugá tin un programa di desaroyo espasial Karibe Hulandes den konsepto ku ta kontené un resúmen di e maneho espasial di e gobièrnu hulandes pa loke ta trata caribe hulandes. Meta di e maneho aki ta un planifikashon espasial sostenibel i sigur di e islanan dor di kontribuí na desaroyo ekonómiko sostenibel, un medio ambiente saludabel, bon kalidat espasial i protekshon di balornan kultural i natural.
Dia 28 di yüni último e sekretario di estado a manda e konsepto di e programa di desaroyo espasial pa parlamento di hulanda. E sekretario di estado a probechá di informá parlamento ku islanan BES ta konfrontá retonan grandi pa loke ta trata e tema espasial. Kresementu di poblashon, kambio di klima, ekonómiko kresementu i transishonnan, seguridat di kuminda, pero tambe e protekshon di e kultura i naturalesa úniko fta rekerí eskohonan espasial. Anto nèt aki e sapatu ta primi. Kolegio Ehekutivo di Boneiru a tuma un desishon krusial pa loke ta trata e plan di desaroyo espasio 2023.
E kolegio ehekutivo a disidí pa terminá trabounan pa loke ta trata e konsepto di diseño preliminar basá riba nan akuerdo di gobernashon 2023-2027. Te ora ku un plan nobo bini segun e kolegio ehekutivo, e plan di desaroyo espasial di Boneiru 2010 lo keda vigente. Kolegio Ehekutivo a enfatisá ku e situashon aktual no ta rekerí un desishon preparatorio, komo ku e plan aktual ta adekuá ainda.
Pa ofresé buskadónan di kas mihó oportunidatnan riba e merkado di bibienda i drecha kalidat di akomodashon rekreativo, e kolegio ehekutivo anterior dia 4 di desèmber 2021 a tuma un desishon preparatorio. Esaki nifiká ku petishonnan ku drenta i klaramente ta bai kontra di e maneho manera antisipá den e plan di desaroyo espasial 2022 den konsepto, ta wòrdu wantá. E desishon preparatorio den 2022 a keda alargá ku un aña mas pero entrante desèmber 2023 a kaduká i nada mas no a bin na su lugá.
Promé ku e sekretario di estado manda e programa di desaroyo espasial pa parlamento di hulanda, outomátikamente e ta konsultá ku e islanan. Esaki a sosodé pa medio di un karta ku fecha 7 di febrüari 2024. Dia 23 di mei 2024 kolegio ehekutivo di Boneiru a manda su punto di bista i ta mustra riba e hecho ku e programa espasial Caribe Hulandes ta buska konekshon ku e plan di desaroyo di Boneiru ku na 2010 a keda aprobá pero durante e último 14 añanan no a keda evaluá.
A bin komprondé ku e karta en kuestion a kai manera un baño di awa friu serka ekspertonan pa motibu ku e ponensia di kolegio ehekutivo ta kompletamente banda di e bèrdat pa no bisa un mentira flagrante. Mester mustra riba e plan di desaroyo 2022 ku debidamente ta sali for di e plan di desaroyo 2010 i e programa di gobernashon 2019 – 2023. Ku esaki e kolegio ehekutivo a mal informá e gobièrnu di hulanda i esaki segun hopi, no por keda sin konsekuensia.
Mester mustra tambe riba e tono di arogansia den e karta di kolegio ehekutivo di dia 23 di mei 2024. Segun e kolegio e programa di desaroyo espasial Karibe Hulandes tin un durashon di 10 aña i por bai kontra di e plan di desaroyo nobo pa Boneiru.
Ta p’esei e kolegio ta pidi e sekretario di estado pa hinka den e programa di desaroyo Karibe Hulandes ku lo evaluá esaki kontra e vishon struktural di Boneiru mesora esaki keda kla den e di dos parti di 2024. Ku tur e ekspertonan ku entidat públiko tin ningun di nan no ta komprondé ku e programa di desaroyo espasial Karibe Hulandes ta di un órden mas haltu ku e plan di desaroyo lokal ? Naturalmente e sekretario di estado no a honra e petishon di kolegio ehekutivo.
Un kos ta kla, e gobièrnu aktual ta bolbe kai bèk riba e plan di desaroyo espasial di 2010 i por ripará esaki kaba. Ta difisil pa e direktorado di supervishon i mantenshon hasi su trabou. Den areanan di kunuku ku ta keda kualifiká un ‘agrarisch gebied’ manshonnan ta bai haltu kitando tur e trankilidat i destruyendo e identidat kultural di e isla.
‘Lei pa un, lei pa tur’ aparentemente no ta gastá na e gobièrnu aktual i nan sinku miembronan den konseho insular i hopi ta puntra ta kua ta e interesnan ku realmente nan ta defendé.
Dr. Willem A. Cecilia
.png)
Comentarios