Dr. Willem A. Cecilia Ku Opinion Tokante Lèkmentu di Informashon - 2do parti

Konseho insular òf esun ku a kompilá e komunikado pa konseho insular, mester ta konsiente ku libertat di prensa ta parti di libertat di ekspreshon.

Na Hulanda i den Caribe Hulandés e libertat di prensa ta ankrá den e Konstitushon.

Tur hende por bisa of skirbi loke nan ke via radio, revista, televishon, internèt i medionan soshal. Kondishon si ta ku tur esaki no ta kontra di lei.

Difamashon, kalumnia, lanta odio òf diskriminashon por èhèmpel ta prohibí.

Si algu ta den violashon di lei, ta wes ta determiná esaki despues di e hecho.

Den un reunion públiko dia 29 di yanüari 2019, konseho insular a aprobá e asina yamá ‘Gentle Agreement’ ku ta trata e mantenshon di integridat polítiko.

E akuerdo di kabayero menshoná ta kontené akuerdonan prosedural kon na un manera kuidadosa ta anda ku posibel violashon di integridat.

Komo konsehero di e presidente di konseho insular e grifir interino mester a informá e presidente di e proseduranan aki ora a konstatá posibel violashonnan di por èhèmpel e kódigonan di kondukta di konseho insular, di kolegio ehekutivo i di gezaghèr mes i e leinan riba kua e kódigonan ta basá.

E presidente na su turno mester entamá un investigashon preliminar si tin sospecho di violashon i ta duna òrdu pa un investigashon di integridat si esaki mester.

E ta evaluá e resultadonan di e investigashon i ta proponé un sanshon apropiá, ta presentá e resultadonan di e investigashon i su rekomendashon na konseho insular, i si mester hasi un denunsia na ministerio públiko.

E presidente por pidi asistensia di ekspertonan interno òf eksterno pa loke ta e pasonan ku e mester tuma.

E komunikado di Konseho Insular sinembargo ta menshoná ku Konseho Insular a konsultá ku gezaghèber i ku ta konseho insular i tambe e presidente di konseho insular esta gezaghèber, a disidí pa entamá un investigashon formal pa loke a pasa i ku posibelmente rechèrshi di Reino tambe lo keda invulukrá.

Un desviashon kompletu di proseso normal i habitual, ku un grado haltu di intimidashon pasobra reshèrshi di Reino a keda menshoná.

Pa konkluí ku nan mes palabra, pa e fortalesa demokrátiko, e gobièrnu lokal i tambe konseho insular, mester apstené di sofoká e libertat di prensa i e liberat di ekspreshon.

Kumpli ku e reglanan di e norma di integridat, hasi un bon investigashon preliminar i no drenta unilateralmente den e emailnan di miembronan di konseho insular sin outorisashon i stòp di hasi deklarashonnan apsurdo.

Dr. Willem A. Cecilia

Bonaire

9 apr. 24