Segun Dr. Willem A. Cecilia, den e sírkulo polítiko na Boneiru no a reakshoná ku masha sorpresa riba e informashon di e kolumna riba internèt ku yama ‘dossier Koninkrijkrelaties’, ora esaki a publiká ku grifir interino di konseho insular a drenta den e asina yamá logfile-nan di e emailnan individual di miembronan di konseho insular i amptenarnan. A nota si sierto sorpresa i preokupashon pa loke ta trata e reakshon riba e totalidat.
Un komunikado di prensa emití pa konseho insular di dia 8 di mart último, ta trese dilanti ku un kantidat di notisia prekupante ta yega e isla, spesialmente via blog personal, medionan sosial i tambe via e úniko korant lokal. Hopi di e publikashonnan aki ta parse di ta basá riba informashon ku ta bini direktamente for di organisashon di gobièrnu di Boneiru, òf for di sírkulonan den i rònt di Gobièrnu.
I ku esaki a establesé e tono pa un búskeda intensivo di forsanan opositor paden i pafó di e aparato gubernamental. Den e komunikado di prensa ya e promé presunto sospechosonan ta wòrdu señala esta e blog personal ku ta ‘dossier Koninkrijkrelaties’ i e úniko korant lokal ku mas ta klaro ta Èxtra Boneriano, i sírkulonan rondó di e gobièrnu di e isla loke ta mustra riba partidonan den oposishon en general, pero en partikular esun ku ta hiba oposishon mas fuerte na e momentonan aki.
Hopi alarmante ta e hecho ku konseho insular ta di opinion ku e klima di media aktual ta un peliger pa demokrasia, ta perhudiká e votadónan, ta un menasa pa bon gobernashon di e isla i ta forma un atake riba e konfiansa den gobernashon, sea esaki ta konseho insular, kolegio ehekutivo, gezaghèber, òf funshonarionan prinsipal konektá ku gobièrnu manera e sekretario di e isla di Boneiru òf grifir di konseho insular.
Ku esaki ta parse ku a kuminsá kana e kaminda pa un oligarguía.
Den pasado resien ya a trese dilanti ku ta parse ku konseho insular a pèrdè e strea di nort i aparentemente te ainda nan no sa unda e ta.
Na promé lugá ta saka un komunikado di prensa i ta poné riba nan wèpsait, pero e prosedura korekto ta ku konseho insular den un reunion púbiko mester tuma un desishon ku ta di akuerdo ku e kontenido pa despues esaki keda publiká.
Awor ta parse ku a delegá e outoridat aki na e grifir interino i aparentemente ta despues konseho insular lo tuma un desishon al respekto lokual no por.
Esun ku a kompilá e komunikado di prensa ta papia di bon gobernashon pero aparentemente e no tin un idea kiku esaki ta enserá.
Na di dos lugá, konseho insular, òf esun ku a kompilá e komunikado pa konseho insular mester ta bon konsiente ku gobièrnu hulandés i esun lokal no mester entremeté den lokual un persona ta bisa òf skirbi. Esei nos ta yama libertat di prensa. Tur hende por bisa i skirbi loke e ke, basta esaki no ta violá lei.
Dr. Willem A. Cecilia
Bonaire
9 apr. 24
.png)
Comments