Djindja na peliger: kiko ta pasando ku e djindjanan?

Durante e último simannan por a mira na Boneiru i Kòrsou kon un kantidat grandi di djindja nanishi puntá a resultá riba kosta. Interesante ta ku e mortalidat akí ta parse un refleho di un suseso na aña 2017 ku e mesun espesie den serkania di Costa Rica. E mortalidat akí no ta solamente un preokupashon pa e djindjanan, pero tambe pa piskánan similar òf pa animalnan ku por alimentá nan mes ku djindja malu, manera turtuga blanku.

E djindja nanishi puntá (Canthigaster rostrata) ta un tipo di djindja chikitu ku por haña tur kaminda den área karibense. E ta relativamente chikitu, e ta krese bira solamente 7 cm largu i ta fásil pa rekonos’é na su boka ku parse boka di para i e strepinan pretu ku blanku na su kurpa. Hopi biaha ta topa ku e piská akí den awa plat rònt di ref di koral, kaminda e ta alimentá su mes ku alga i bestia chikitu sin wesu di lomba, manera por ehèmpel kabaron. Aunke ku kisas e ta parse inofensivo pa motibu di su tamaño chikitu, djindja nanishi puntá de fakto ta hopi venenoso. Meskos ku tur djindja e tambe ta kontené un toksino fuerte ku ta konosí komo ‘tetrodotoxine’ ku bo ta haña den su kueru, su higra i otro órganonan.

Boneiru i Kòrsou

Durante e último simannan Boneiru i Kòrsou a mira un kantidat grandi di e djindjanan akí subi kosta. Aunke e kousa ta deskonosí ainda, probablemente esaki ta relashoná ku e eksploshon di populashon ku a opservá riba ref durante e lunanan anterior. Esaki ta komparabel ku e mortalidat masal na aña 2017 ku a tuma lugá a lo largo di e kosta karibense di Costa Rica.

Costa Rica

Despues di e insidente na Costa Rica akí nan a kolektá i investigá djindja individual pa identifiká kousa di e mortalidat masal akí. Nan tabata pensa ku e episodio akí lo por tabata relashoná ku susesonan similar na otro ubikashonnan karibense i posiblemente lo tabata relashoná ku kambio den temperatura di laman òf agotamentu di rekurso durante nan periodo di oumento di populashon. Finalmente no por a identifiká ningun kousa, pero e investigashon a enfatisá e nesesidat pa dokumentá i sigui indikadónan di kambio den oséano, i pa sientífikamente dokumentá susesonan di mortalidat.

Impakto

E bista di sentenares di e djindjanan chikitu akí ku a subi kosta na Boneiru i Kòrsou, mesora a okashoná preokupashon na e islanan akí. Aparte di ku esaki ta alarmante pa habitantenan i turistanan, e djindjanan malu akí por tin un impakto signifikativo tambe riba otro bestia ku posibelmente ta en buska di kuminda, pa motibu ku e piskánan akí por ta sumamente venenoso. Turtuga blanku ta komedó oportunista, loke ta nifiká ku rápidamente nan lo morde riba piská morto ku nan haña a lo largo di ref. For di kuminsamentu di e insidente akí Sea Turtle Conservation Bonaire (STCB) ya kaba a haña algun notifikashon di turtuga blanku ku a bira malu. Te ku awor STCB tabatin ocho turtuga den rehabilitashon i a ehekutá nekropsia riba dos turtuga blanku hóben. Durante e outopsia STCB a deskubrí 37 djindja, un pasaboka mortal pa un turtuga blanku hóben, den stoma di un di e turtuganan.

Implikashon

Aunke te ainda no tin un kontesta klarito riba e pregunta kiko ta kousa di e mortalidat masal akí, probablemente esaki ta relashoná ku e oumento di populashon ku a opservá den e lunanan anterior. Kompetensia ekstremo pa yega na rekurso por kondusí na e echo ku kantidatnan grandi di nan populashon ta resultá desnutrí òf vulnerabel pa malesa. No ta parse ku loke a kousa e mortalidat masal akí ta afektá otro espesienan di piská, pero ta importante pa keda alerta i mèldu opservashonnan inusual na outoridatnan lokal di parke.

DCNA

Dutch Caribbean Nature Alliance (DCNA) ta sostené komunikashon sientífiko i ‘outreach’ den region hulandes karibense pa medio di hasi informashon sientífiko relashoná ku naturalesa mas ampliamente disponibel via entre otro Dutch Caribbean Biodiversity Database, DCNA su plataforma di notisia BioNews i via prensa. E artíkulo akí ta forma parti di e resultadonan di diferente investigashon sientífiko, pero e investigashonnan mes no ta investigashon di DCNA. No por derivá ningun derecho for di e kontenido. DCNA no ta responsabel pa e kontenido i e konsekuensianan indirekto ku ta surgi for di publikashon di e artíkulo akí.

BròKèS 93.5 ………… Skuch’é!