Tourism Corporation Bonaire (TCB) a duna su kontribushon na e aktividat di Arte di Palabra organisá pa SKAL mirando importansia di e evento pa motibu ku ta trata di hóbennan talentoso i ku den un forma úniko e aktividat ta duna balor na nos idioma papiamentu. Banda di esaki e kompetensia ta stimulá uso di nos idioma materno papiamentu serka hóbennan di grupo 8 di skol básiko i di enseñansa avansá.
Na un manera kreativo e hóbennan ta eksplorá i eksperensiá amor pa literatura na papiamentu. E hóbennan ta realisá esaki den diferente tipo di ekspreshon pero prinsipalmente pa medio di poesia i kuenta. Pa medio di inspirá e hóbennan i hasi nan konsiente di uso di nos idioma, Arte di Palabra ta forma hóbennan ehemplar pa Boneiru ku ta bira embahador di nos idioma papiamentu. Komo embahador nan ta salbaguardá nos idioma papiamentu ku amor i rèspèt.
Aparte di esaki Arte di Palabra Boneiru ta inspirá i forma outornan i aktornan hóben pa amplia, promové i konservá nos literatura na papiamentu.
Promé ku e kompetensia di Arte di Palabra a inisiá tur e partisipantenan ku a kompeti i algun miembro di e tim di Arte di Palabra a reuní na TCB i despues nan a hasi un rekorido chikitu den Playa ku a terminá na Jong Bonaire. E rekorido tabata den e ‘treintje’ di Jack Tours ku awor ta kompletamente kubrí ku e ‘branding’ di TCB: It’s in our nature.
Na yegada di e partisipantenan na Jong Bonaire nan a risibí un gran aplouso di e públiko i mesora e kompetensia a ranka sali.
Miles Mercera, direktor di TCB, tambe a hiba palabra, deseando tur e partisipantenan éksito i el a sigurá nan ku pa TCB ta un honor pa forma parti di e evento di Arte di Palabra.
TCB ta felisitá tur e ganadornan i ta deseá nan hopi éksito pa e kompetensia di Arte di Palabra ABC 2023 ku ta bai tuma lugá na Aruba.
BròKèS 93.5 ………… Skuch’é!
.png)
Comentarios