Diskurso di Daisy Coffie Miembro di Konseho Insular i Lider di Frakshon M21

Awe nos ta selebrá bahamentu ofishal di gezaghèber aktual Sr. Nolly Oleana i subimentu ofishal di e gezaghèber nobo den persona di Sr. John Soliano. E ta alabes tambe un traspaso di un generashon pa e otro generashon. M21 ta usa e okashon aki pa den algún palabra yama danki na Sr. Oleana i yama bonbiní na Sr. Soliano ilustrando karakterístikanan di e periodo kòrtiku di Sr Oleana i e ambishonnan ku Sr. Soliano a proponé su mes den e perido benidero.

Gezaghèber Sr. Nolly Oleana durante su término a risibí hopi apresio pa su dedikashon na diversividat, inklushon i libertat di prensa. Esakinan tabatin i lo tin un impakto duradero riba akseptashon i igualdat den nos komunidat.

No ta pornada el a risibí e “Pride Award 2024” pa su dedikashon na diversividat i inklusividat. Esaki a aksentuá su ròl importante komo luchadó pa igualdat i hustisia. P’esei i su otro trabounan mi ta yam’é danki i ta deseá Sr. Nolly Oleana tur kos bon den su di tres etapa di bida i ku e lo por realisá e soñonan ku semper ela kana kuné i ku a keda interumpí parsialmente pa e trabou pisá di ta tata di komunidat.

Sr. John Soliano tin un karera impreshonante tras di lomba ku eksperensia tantu den sektor públiko komo den sektor privá. Ela indiká ku integridat i inklusidat lo ta e pilarnan importante pa karga su liderato.

Spesífikamente el a indiká ku durante su periodo komo gezaghèber e lo ke dirigí su mes riba un kantidat di arianan importante. Esnan mas importante ta

1.⁠ ⁠Durabilidat i Medio-ambiente: Sr. Soliano ke dediká su energía, konosementu i eksperensia den protekshon di e naturalesa i medio-ambiente úniko di Boneiru, kua ta enserá inisiativanan pa energía duradero i konservashon di nos sistema ekológiko marino.

2.⁠ ⁠Desaroyo ekonómiko: Sr Soliano ke kontribuí na promové kresementu ekonómiko atraves di kresementu di turismo i empresanan lokal enfokando pa krea trabou pa nos hendenan lokal.

3.⁠ ⁠Enseñansa i salubridat: Sr. Soliano ke invertí den mehorashon di nos enseñansa i salubridat di moda ku tur boneriano tin akseso na servisionan kualitativamente bon.

4.⁠ ⁠Partisipashon di komunidat: Sr. Soliano ta enfatisá importansia di inklusividat i ke perkurá pa skucha i respetá tur bos den nos komunidat.

Sufisiente punto di atenshon pa realisá den un periodo di seis aña, ku ta duna direkshon konkreto i kla kiko nos ke logra. M21 ta deseá Sr. John Soliano, sabiduría i iluminashon i e por konta ku den su ambishonnan den M21 e lo tin un partner ku lo kontribuí positivamente pa nos logra. NOS POR PASO NOS KE. Pabien ku e funshon nobo i keremi speshalmente partisipashon di un i tur lo ta yabi di éksito di bo periodo, Sr. Soliano.

Daisy Coffie

Miembro di Konseho Insular Bonaire

Lider di Frakshon M21

Boneiru, 3 di ougùstùs 2024.