top of page
Bashi
ggzsjjg.png

Diputado Thielman ta kometé violashon serio di lei

Thielman tin ku tene honor na su mes


Étika den polítika ta determinante pa fortifiká e konfiansa ku miembronan den Konseho Insular den representashon di pueblo boneriano mester tin den e mandatarionan ku nan ta nombra komo diputado. Ora e konfiansa ei haña un sla ta un regla no-skirbí ku esun ku a kousa e deskonfiansa ta tene honor na su mes i no ta laga Konseho Insular ekspresá esaki den un moshon. Diputado Hennyson Thielman a reta Konseho Insular pa tin konfiansa den dje, pasobra e akusashon ku e kompania Hype Event Planner lo ta operando un edifisio pa tene evento ku no ta disponé di un pèrmit di konstrukshon, ta un insinuashon sin base ku e meta pa hiba un polítika bou di nivel. E diputado a sostené su ponensia asta indikando ku el a para tur aktividat di e kompania ku por krea òf aparentá di krea konflikto di interes pa su persona den funshon di diputado. Pa duna e prueba ku Konseho Insular por konfia den su integridat, el a pidi gezaghèber, komo protektor di bon gobernashon i integridat di gobernashon, pa hasi un investigashon riba e kompania Hype Event Planner.


Den kaso di diputado Thielman su integridat ta dòbel pisá ya ku e ta diputado tantu di e direktorado ku ta duna pèrmit, esta Planifikashon di Desaroyo, komo di e direktorado ku ta kontrolá balides di pèrmit, esta Supervishon i Mantenshon di Lei. Resultado di e investigashon di parti di gezaghèber ta poné den un karta fechá 5 di sèptèmber 2023 i esaki ta konfirmá ku e kompania, Hype Event Planners no tin pèrmit di konstrukshon, pero sí un pèrmit di tene evento. Por sierto diputado Thielman den e reunion di Konseho Insular di 11 di yüli 2023 ta referí vários bes na “nos kompania”. E kestion pues ku a tene un evento den un edifisio sin pèrmit di konstrukshon a keda konfirmá pa gezaghèber a base di un investigashon.


Konsientemente

Diputado Thielman a krea konfushon i un impreshon robes serka tantu Konseho Insular komo pueblo di Boneiru, pa medio di tira blòf i urgi gezaghèber pa laga hasi investigashon riba státùs di nan pèrmitnan, miéntras ku diputado tabata bon na altura ku nan kompania no tin un pèrmit di konstrukshon na e sitio menshoná. Konstruí sin pèrmit ta un akto ku ta kontra lei. E eksigensia pa pèrmit ta preskribí pa lei i ta ankrá den Ordenansa di Konstrukshon Boneiru, den e Dekreto di Konstrukshon BES i tambe den Plan di Desaroyo Teritorial Boneiru. Ta trata di leinan vigente. Pa medio di traha sin pèrmit di konstrukshon, e kompania konsientemente a falta ku lei.


Konflikto serio di interes

Faltando ku lei den su funshon komo mandatario, diputado Thielman ta tacha su propio integridat, integridat di e aparato gubernamental di Boneiru i imágen di henter pueblo boneriano. I si mira funshon di e diputado, esta tantu enkargá ku dunamentu di pèrmit komo kontroladó di pèrmit, e konklushon ku evidensia ta ku aki tin konflikto serio di interes i asta ta konfirmá un di e konklushonnan di e rapòrt di ‘Vergunningverlening, Toezicht en Handhaving – VTH’ ku a mustra ku hopi aktividat ta tuma lugá sin e pèrmitnan nesesario i ku ta despues ta legalisá esakinan otorgando e pèrmitnan rekerí. Tambe e rapòrt a indiká ku no ta trata aki di insidente pero un sistema struktural.


Mal uso di poder

E koko a kibra den kara di e diputado i e kestion akí no por bai drumi ni por hink’é den lachi di olvido. A tacha sin mas e konfiansa den e diputado. E ta un asuntu serio? E kontesta ta “si”, pasobra akí ta trata di violashon di nos reglanan ku konosementu di e diputado. Pues klaramente ta mal uso di poder di e mandatario. Ademas e ta violashon -ku saber di e diputado- di prinsipionan di bon gobernashon, entre kua e prinsipio di legalidat i e prinsipio di trato igual. E diputado en kestion no por ni pensa di keda ketu i kere ku e asuntu akí ta pasa bai. E tin ku aktua i un manera di aktua ta pa pidi públikamente diskulpa i tene honor na su mes. Si e mes no aktua e ora ei Konseho Insular ku a nombra e diputado lo mester evaluá i konsiderá si e diputado por sigui gosa di konfiansa di Konseho Insular. Si esaki tambe pasa bai, mas argumento ta riba mesa pa primeramente komunidat pèrdè e krenchi di konfiansa den polítika i gobernashon di nos isla i lo ta más kuminda pa Hulanda haña pa hustifiká un intervenshon. Sigur riba e kestion akí, kaminda ya kaba e rapòrt di VTH a duna komo rekomendashon pa pone dunamentu di pèrmit i supervishon di pèrmit bou di un ofisina hulandes.

Étika polítiko

Ta e akumulashon di tantísimo aktonan di mal gobernashon, di falta di integridat gubernamental i di falta di konfiansa ta forma e base pa kita aun mas outonomia for di Boneiru. Kada biaha di nobo nos ta demonstrá ku nos no ta kla pa karga ni e outonomia ku nos tin te pa nos bai pa mas. Miéntras ku Konseho Insular ta hasiendo tur su esfuerso, en todo kaso riba papel i ku boka, pa konvensé Hulanda ku nos ke tuma rienda den nos mes man i ku yudansa di Hulanda mester ta komplementario, nos akshonnan ta demonstrá todo lo kontrario. Tristu pero bèrdat. Pa kuminsá rekobrá nos terenonan pèrdí nos lo mester kuminsá praktiká étika polítiko. Esaki ta konta pa e mandatario, i mas pisá ainda pa Konseho Insular ku no por permití ku ta tacha konfiansa i keda sin aktua.


Daisy Coffie

BròKèS 93.5 ………… Skuch’é!

5 views0 comments
bottom of page