Segun Dr. Willem Cecilia ta trese un komunikado; Patrimonio kultural inmaterial òf intangibel, ta konsistí di patrimonio intelektual i e sentido ku ta hasi e komunidat úniko, manera su tradishonnan, e gastronomia, literatura, religion, ritonan, músika i patronchinan di komportashon ekspresá den téknikanan, historia oral, músika i baile.
Patrimonio kultural inmaterial ta kustumbernan òf tradishonnan di ántes ku e pueblo ta purba di mantené. Ta konosementu òf habilidatnan ku e pueblo kier mantené bibu i kier pasa pa e siguiente generashon.
E organisashon NAAM establesé na Kòrsou ta plama konosementu di historia i herensia kultural – tantu material komo inmaterial – di Boneiru, Kòrsou, Saba, St. Eustatius i St. Maarten i ta fortifiká identidat kultural di nan poblashonnan den un perspektiva karibense. E herensia kultural ta inkluí e artefaktonan i memoria kolektivo di un sosiedat, komo fuentenan esensial di su historia, kultura i identidat. Un ehèmpel klave den esaki ta e trabounan di Fuhikubo bou di direkshon di Boi Antoin.
Den su tésis ‘Nos Dushi Boneiru’ pa su ‘master’ den siensianan antropólogo kultural na aña 2010 Karin Koolen a argumentá ku e kultura di Boneiru komo ‘e manera di biba’ di ántes ta wòrdu transformá den un idea ‘rektifiká’ di e kultura boneriano, pa asina usa esaki komo un instrumento den e forsanan di poder kambiando.
E ophetivo ta pa krea noshonnan fuerte di konfiansa, sentido di pertenesé na un grupo i di solidaridat, i un sentido di ‘nos’ pa kontra arestá e ‘nan’. Alabes tambe pa hasi unu konsiente ku su patrimonio kultural ta un entrada si esaki na un manera efisiente por keda transformá den un produkto turístiko. I ta netamente aki mi kier a yega den e disputa di un dia liber di Rincon si òf nò.
Na Hulanda tin ocho dia ku ta konsiderá komo ‘dia ofisial di fiesta’. Pero no tin un lei ku ta mara un dia ofisial di fiesta na un dia liber. Esaki ta keda reglá den e CAO.
Den Karibe Hulandes e dianan ofisial ta keda reglá den artíkulo 23 di Arbeidswet BES. Pero na Hulanda tambe tin e asina yamá ‘lokale feestdagen’ kaminda na e lugá òf region un dia liber ta konta. Laga nos tuma por ehèmpel ‘Leiden ontzet’ na Leiden ku ta kai fiho dia 3 di òktober 2018. E ta un dia di fiesta lokal i e komersio lokal te asina leu ku ta posibel i tambe e gobièrnu lokal ta duna liber.
I asina mi ta bolbe yega bèk na Boneiru. Dia di Rincon mester keda proklamá komo un patrimonio kultural inmaterial. Despues mester sòru pa Dia di Rincon subi riba lista di inventario di patrimonio inmaterial kultural ku ta keda manehá pa ‘Kenniscentrum Inmaterieel Erfgoed Nederland’. Un patrimonio kultural inmaterial riba e lista por ehèmpel ta e ‘tambú’ di Kòrsou, kaha di òrgel i kuentanan di Nanzi.
Konklushon ta ku Boneiru por regla su dia liber lokal independientemente di Hulanda i ta duna esaki mas forsa si ‘Dia di Rincon’ subi riba lista di inventario di patrimonio inmaterial kultural Hulandes. Asosashon di Bankonan i RCN ta duna nan empleadonan liber dia 30 di aprel awor, gobièrnu lokal ta duna su empleadonan liber, i mi ta asumí ku komersio te asina leu ku ta posibel, lo duna su empleadonan liber, òf sindikatonan mester regla esaki den CAO’nan pa futuro. Boneiru asina no ta pèrdè su djaluna di karnaval i tampoko no mester pidi Hulanda pa ningun dia liber èkstra.
.png)
Comments