Detenshon Pa Ladronisia di Skuter i Enkubrimentu

Notisia di polis di djárason 19 di yüni te ku djabièrnè 21 di yüni 2024

Detenshon pa ladronisia i enkubrimentu; Djaweps 20 di yüni, alrededor di 10.15 or di mainta, a detené un hòmber di inisial H.A.W. di 18 aña di edat riba Kaya Korona pa ladronisia i enkubrimentu. E sospechoso tabata kore riba un skuter ku a hòrta den oranan di mardugá di djamars 18 di yüni na un kas situá na Kaya Renata.

E doño di e skuter a rekonosé su skuter na momentu ku e sospechoso tabata kore esaki riba Kaya Korona i a yama polis mesora tokante e situashon. E doño a sigui e sospechoso i a logra par’é na altura di un establesimentu di hóreka riba Kaya Korona.

Na yegada di e patruya, a verifiká ku en bèrdat e skuter tabata hòrtá.

A detené e sospechoso mesora i a konfiská e skuter pa mas investigashon.

Algun ratu despues a tene un entrada hudisial na un kas riba Kaminda Lagun.

Durante e entrada hudisial a topa ku diferente artíkulo relevante pa e kaso i a konfiská esakinan. Investigashon den e kaso ta kontinuá.

Ladronisia na bich; Djaweps 20 di yüni a drenta keho di ladronisia na Playa Pal’i Mangel situá na Bulevar E.E.G. Entre 2.45 or di atardi i 3.45 or di atardi, deskonosínan a bai ku tres tas miéntras e doñonan tabata snòrkel. Ta trata di un tas di bich koló ros, un tas di kompra koló blou i un tas di lomba koló pretu di e marka ‘Eastpak’.

Den e tasnan tabatin entre otro, un krema kontra solo, un Iphone 13 koló blou, un yabi di outo, paña, dos bòter di awa, un telefòn koló pretu di e marka Oneplus, un pòtmòni di kueru koló pretu, un OV-Card, un karchi pa habri porta i sèn kèsh. Ta investigando e kaso.