E delegashon di Hulanda ku ta na Boneiru djamars 17 di yanüari den kuadro di un museo nashonal di sklabitut, ke skucha opinion di pueblo. E miembronan ke tende di habitantenan di Boneiru i tambe di otro islanan i Sürnam kiko nan ke pa tene kuenta kuné den un museo asina. Djamars anochi tin un enkuentro ku públiko na Skal kaminda tin e posibilidat aki pa dialogá ku e delegashon. Esaki ta kuminsá pa 7 or di anochi i tur hende ta invitá na esaki.
Meta
E delegashon ta deskribí meta di su bishita asina aki: “Meta di nos biahe ta pa bai den un diálogo ku hendenan na kada isla. Pa medio di diálogo, nos ke skucha idea di habitantenan tokante e museo. Ku esaki nos ke haña informashon pa yega na un museo mas inklusive. Gustosamente nos ke sa kon nos por inkorporá nan ideanan i/òf deseonan den nos plan. E diálogonan ta di importansia esensial.”
E delegashon ta konsistí di: Peggy Brandon (kwartiermaker museo), Diana Landveld (hefe di sekshon di Direktorado Enseñansa, Hubentut, Kuido i Diversidat di Munisipio Amsterdam), Irene van Renselaar (konsehero di maneho di Ministerio di Enseñansa, Kultura i Siensia) i John Leerdam komo kwartiermaker sosial, rekoudashon di fondo i relashon polítiko.
Storia amplio
E intenshon awor ta pa traha un museo ku tin espasio pa un storia amplio di e pasado di sklabitut hulandes. E mester tin un programa ku ta atraé un públiko grandi i diverso, kaminda un sentro di investigashon i konosementu ta forma parti di dje. Un museo habrí pa grandi i chikitu i tur grupo di komunidat. Un lugá bibu pa presentashon, kòmbersashon, sine i músika, pero spesialmente un lugá seif pa reflekshon i konmemorashon. Tambe ku espasio pafó pa reflekshon i aktividat kultural. Un museo tambe ku no ta kuminsá te na 2028 ora kaba ku e edifisio, sino for di 2023 kaba ta kuminsá ku un programashon atraktivo.
===========================================
BròKèS 93.5 ………… Skuch’é!
.png)
Comments