Nov 17, 20221 min read

CHÈNS PA AKUERDO AMIKAL ENTRE ASOTEKO Y GOBIÈRNU

‘No bende su kueru promé ku a tira e oso mata’. Esei ta un dicho Hulandes ku ta nifiká ku bo no mester primintí nada promé ku bo por kumpli. Pues, nos no ta primintí nada. Nos ta señalá solamente ku ASOTEKO i gobièrnu ta purbando ketu bai pa yega na un akuerdo amikal.

ASOTEKO kier yega na un akuerdo. PERO e akuerdo mester ta bon, sino nos ta gaña nos miembronan. Sinembargo, mester konfirmá ku gobièrnu te ainda ta aktuando seriamente i diputado James Kroon a demostrá ku e tambe kier un bon akuerdo.

E ta komprondé e situashon penoso ku hopi hende ta haña nan mes aden, kaminda nan tin ku paga hür haltísimo, miéntras ku gobièrnu no ta duna tereno pa nan por traha nan mes kas òf pone un ‘woon-container’ riba dje.

Pues Diputado Kroon tambe kier un akuerdo ku realmente lo solushoná e problema.

Esei kiermèn ku mester duna tereno rápido i na gran kantidat. E akuerdo ta bai den e direkshon ei, sigur pa esnan ku ya ta riba lista di espera.

Pa splika un k’e otro ASOTEKO ta yama un Reunion pa tur miembro dia 19 di novèmber 2022 pa 7or anochi den kurá di ofisina di abogado Bijkerk na Antriol. Tur miembro di ASOTEKO ta bonbiní. Otro interesadonan tambe ta liber pa asistí.

ASOTEKO ta e Asosiashon pa Otorgamentu di Tereno di Erfpacht sin Korupshon.