CBP BES Ku Intenshon Di Òrdu Someté Na Kastigu Di Pago Riba Gobièrnu di Boneiru

Komishon Supervishon Protekshon di Datonan Personal BES (CBP BES) tin intenshon di imponé un òrdu someté na kastigu di pago (last onder dwangsom) riba Gobièrnu di Boneiru. A tuma e paso akí pa motibu ku EPB no a sigui e konsehonan di CBP BES i no a kumpli ku akuerdonan anterior.

Na mart 2023 CBP BES a hasi un kontrol na Entidat Públiko Boneiru.

For di esaki a resultá ku Gobièrnu di Boneiru no a implementá sufisientemente e maneho di ‘clean desk’ i ‘clear screen’, parti di e maneho ‘Na Kaminda Pa Bira Konsiente di Siguridat di Informashon’. Pa e motibu ei no a protehá datonan personal adekuadamente.

Apesar di e rapòrt i ‘deadline’ stipulá di òktober 2023 i promé di mart 2024,

Gobièrnu di Boneiru a keda sin tuma e medidanan nesesario, aloménos a keda sin informá CBP BES adekuadamente al respekto.

Ademas Gobièrnu di Boneiru no a duna un reakshon supstansial riba preguntanan di CBP BES, ku mester a kontestá promé ku 22 di aprel 2024. 

A base di loke tin ariba menshoná e Komishon ta konkluí ku Gobièrnu di Boneiru no a implementá e maneho ‘Na Kaminda Pa Bira Konsiente di Siguridat di Informashon’ debidamente ku komo konsekuensia ku gobièrnu (ainda) no ta kumpli ku protekshon adekuado di dato personal organisatorio i tékniko na diferente lugá di trabou.

E komishon a inkluí rekomendashonnan ku mester haña prioridat i pasonan ku mester tuma den e rapòrt. Te ku awe no a sigui e rekomendashonnan akí.

CBP BES pa e motibu ei tin intenshon di imponé un òrdu someté na kastigu di pago pa logra ku ta realisá e mehorashonnan ku ta konsiderá nesesario den Gobièrnu di Boneiru riba tereno di protekshon organisatorio i tékniko i pa logra ku ta realisá  maneho di Clean Desk/Clear Screen.

Un òrdu someté na kastigu di pago ta un instrumento di mantenshon di korekshon ku CBP BES tin na su disposishon. Ta trata di un òrdu someté na kastigu di pago ku ta suma $15.000 si keda sin implementá medidanan na tempu, ku por oumentá te na un máksimo di $90.000,- relashoná ku tempu ku transkurí.

Ta konsiderá e medida akí apropiá pa laga Gobièrnu di Boneiru move i ainda ehekutá e rekomendashonnan preskribí i prevení ku ta sigui violá legislashon di privasidat.

CBP BES ta enfatisá ku protekshon di dato personal di habitantenan di Boneiru, Sint Eustatius i Saba ta krusial.