- Mar 21, 2023
- 3 min read

BRÒKÈS 93.5 KU ANÁLISIS DI RESULTADO DI ELEKSHON SIN EMOSHON

Den programa Parib’i Kas ku Djòni Leoneta i Joy Mercera

Djaluna último den nos programa Parib’i Kas na BròKèS 93.5, nos a tira un bista riba kampaña elektoral 2023, resultado i en partikular e desaroyonan tokante formashon di un gòbièrnu nobo. Ku resumen tambe di resultado i koalishonnan for di 2011 te ku 2019, nos a indiká bon kla ku no ta nada nobo un posibel formashon di koalishon, sin partisipashon di e partido ku a optené mayor kantidat di voto, pero no asiento. Nos no ke argumentá si esei ta korekto si òf nò. Pero sí nos ke ilustrá ku tur e argumentu i gritunan di emoshon ku ta bini dilanti, hasiendo komo sifuera ta mundu ta bini abou, no tin masha sentido, esei pa motibu ku inkluyendo e aktual partido mayoritario den pasado a hasi igual i sigur na mas ku un okashon. Ta for di situashon polítiko similar a nase e dicho; Gana Anochi, Pèrdè Mainta, i kual tambe por sierto ta den polítika so so te ainda esaki ta bini dilanti.

Tambe nos a papia tokante e asuntu di 75% di repartishon di voto pa yega na un asiento, kual hopi hende ta komentá riba dje último dianan komo sifuera ta algu nobo den elekshon aki na Boneiru. Esei siendo ku ya den e promé elekshon despues di 10-10-10 o sea na 2011, PHU di Michiel Bijkerk i Rafael Santana a bira e promé partido ku a optené un asiento a base di e 75%, pues inhustu si òf nò nada nobo. Ironia di bida ta ku hustamente Partido Demokrat e tempu ei a forma koalishon ku MBL i PHU ku su un asiento lográ ku 75% di repartishon di voto, ku a impedí UPB pa a yega sinku asiento.

Sin kita ku nos por keda ku mesun fervor si òf nò, simpatisá e partido deseá, nos komo votadó mester kuminsá informá nos mes mihó i komprondé mihó sikiera e base, i detayenan prinsipal di nos sistema elektoral.

Esei entre otro ta evitá ku simplemente pa simpatia nos ta keda lansa gritu di emoshon i kompletamente sin sentido.

Nos mester ta konsiente ku den ‘e wega yamá polítika’ i nos sistema elektoral, tambe e bala ta rondó. Anto igual ku tur wega, den e wega en kuestion tin regla ku ta eksigí, tin relgla ku ta prohibí i tin tambe regla ku ta pèrmití. Hopi bes nos manera pa mira e situashon ta dependé na kua banda di kancha nos ta pará. Banda di esei fuera di solamente hasi polítika (politíko ku no ta hasi polítika No ta un bon politíko), polítikonan tin tambe e deber pa eduká komunidat en general, en partikular siguidónan tokante nos sistema elektoral i gobernashon.

No mester skonde, tantu Joy Mercera komo Djòni Leoneta, tin nan propio pensamentu o preferensia politítiko ‘igual ku un i tur tin’, pero den e kaso aki nan a hasi e análisis for di un punto di bista ophetivo, i manera Cedric Soleana a komentá durante e programa, tabata trata di ‘un análisis di resultado di elekshon sin emoshon’.

Athuntu un bista riba resultado elekshon i koalishonnan for di 2011 te ku 2023.

ELEKSHON KONSEHO INSULAR BONEIRU 2011 - 2015