Ku desaroyo di un vishon nobo pa mobilidat na nos isla, entidat públiko Boneiru ta pone un paso importante den direkshon di progreso sostenibel. Pa motibu ku nos poblashon ta kresiendo i sostenibilidat ta importante, Boneiru su aspirashon ta pa stimulá uso di vehíkulo limpi i otro formanan di mobilidat.
Pa realisá e vishon pa mobilidat akí, Gobièrnu di Boneiru a pidi interesadonan pa traha huntu riba un vishon ku ta kuadra ku kultura, futuro i deseonan di Boneiru. Pa e motibu akí entidat públiko Boneiru, huntu ku Marc van Seijs, un eksperto riba tereno di mobilidat i kambio di komportashon di e ofisina di konseho &Morgen, ta organisá algun seshon den luna di ougùstùs. Durante e enkuentronan akí ta papia tokante vários trènt di desaroyo i ta traha riba Boneiru su vishon nobo pa mobilidat. Dia 17 di ougùstùs nan a kuminsá ku un seshon ku empleadonan públiko. Dia 24 i 31 di ougùstùs e seshonnan ku stakeholdernan eksterno ta tuma lugá.
Ku e, segun ekspektativa, oumento fuerte di e kantidat di habitante durante e añanan binidero, Boneiru ta para dilanti di desafionan grandi riba tereno di mobilidat i infrastruktura. E meta pa tene nos isla habitabel i pa na mes momentu e ta sostenibel tambe, ta pidi pa kambio den mobilidat. Esaki no ta solamente bon pa nos medio ambiente, pero e ta sirbi tambe pa mehorá nos tráfiko i stimulá inklushon.
Diputado Thielman: ‘E vishon nobo pa mobilidat ta un paso importante den direkshon di un futuro sostenibel pa Boneiru. Kolaborashon i lasonan stratégiko di kolaborashon ta forma e núkleo di nos ambishon pa desaroyá Boneiru den un forma mas sostenibel. Nos tin ku traha huntu pa hasi nos isla mas atraktivo pa tantu e generashonnan aktual komo e generashonnan di futuro. E sosten di Ministerio di Infrastruktura i Maneho di Awa i e enbolbimentu di kompanianan di gobièrnu ta fortifiká nos esfuerso pa kambia e normanan di mobilidat na Boneiru i redusí nos impakto ekológiko.’
BròKèS 93.5 ………… Skuch’é!
.png)
コメント