top of page
ggzsjjg.png

Boneiru ta selebrá Luna di Turismo ku vários aktividat den luna di sèptèmber


For di 2 di sèptèmber Tourism Corporation Bonaire (TCB) a plania diferente aktividat durante henter luna di sèptèmber pa selebrá Dia Mundial di Turismo! Tur aña dia 27 di sèptèmber nos ta selebrá Dia Mundial di Turismo. E meta di Dia Mundial di Turismo ta pa hasi hendenan konsiente di importansia di turismo den komunidatnan nashonal i internashonal i pa pone énfasis riba e balor ekonómiko agregá di turismo.


For di djasabra 2 di sèptèmber i tur otro djasabra den luna di sèptèmber tur bishitante ku yega Flamingo International Airport ta keda saludá ku e ritmo di Boneiru su músika folklóriko. Bishitantenan por saka potrèt ku nos embahadornan lokal, bistí den trahe tradishonal folklóriko. Komo muestra di nos gratitut tur bishitante ta risibí un regalo di bon biní komo parti di nos programa di krea laso ku bishitante, yamá Bonaire Ambassadors.


Dia 6 di sèptèmber nos ta selebrá Dia di Boneiru. Riba e dia akí gobièrnu di Boneiru ta organisá un seri di aktividat i e aktividatnan anual di Bonaire Bikers Club riba henter nos isla na honor di Dia di Boneiru ta forma un punto kulminante úniko.


E aña akí dia 23 di sèptèmber TCB ta organisá un ‘Tourism Scavenger Hunt’, un spùrtògt dibertido i edukativo den sentro di Playa pa hóbennan di 9 te 12 aña. E spùrtògt ta konsistí di vários parada ku desafio eksitante i aktividat plasentero ku e muchanan ku ta partisipá tin ku kompletá pa haña punto. Ta anunsiá e ganadónan di e spùrtògt durante e evento di Taste of Bonaire dia 30 di sèptèmber.

Resientemente TCB a anunsiá lansamentu di su aktivashon nobo i emoshonante, esta e ‘Capture Bonaire Photo Contest 2023’. E kompetensia ta dura kuater siman, for di 28 di ougùstùs te ku 24 di sèptèmber. Dia 26 di sèptèmber 2023 ta selektá i anunsiá e tres mihó ganadónan for di tur e potrètnan ku a drenta riba e wèpsait www.bonaireisland.com/photo-contest/. Nos ta enkurashá tur partisipante tambe pa kompartí nan potrètnan riba medionan sosial i tag @bonaireisland i usa i siguiente hashtagnan: #CaptureBonaire2023 #ItsInOurNature.


For di 23 te ku 30 di sèptèmber Boneiru ta organisá e Siman di Buseo Boneiru den kolaborashon ku PADI, e organisashon mas grandi na mundu pa eksplorashon di oséano i pa sambuyadónan. E evento akí ta dura un siman i ta enserá un sin fin di aventura pa tantu sambuyadó amatùr komo sambuyadó eksperensiá, i ta ofresé nan e oportunidat pa eksperensiá Boneiru su naturalesa bírgen i deskubrí e mundu bou di laman yen di variashon. Pa mas informashon bai riba padi.com/padiclubbonaire


For di 25 te ku 30 di sèptèmber TCB ta organisá su promé Bonaire International Tourism Conference (konferensia internashonal di turismo), kaminda ta yama bon biní na komersiantenan por mayor, operadornan di tour, agensianan di biahe i partnernan turístiko for di Oropa i Nortamérika. E Bonaire International Tourism Conference ta un posibilidat pa nos partnernan internashonal eksperensiá e produkto úniko ku Boneiru tin pa ofresé na su bishitantenan, i alabes enkuentronan ku partnernan for di sektor privá. Banda di esaki ta un tremendo oportunidat pa nan siña mas tokante Boneiru su strategianan di merkadeo, deskubrí loke Boneiru tin di ofresé pa loke ta trata tantu produkto komo propiedat, topa ku partnernan nobo di nos isla i krea oportunidatnan komersial nobo pa nos isla. Dia 26 di sèptèmber TCB ta organisá un evento di ‘Let’s Meet & Flamingle Business Speed-date’, kaminda e partnernan na nos isa por topa potensial i aktual komersiantenan por mayor, operadornan di tour i agensianan di biahe òf drenta di nobo den kontakto ku nan. Meta di e ‘speeddate’ komersial akí ta pa partnernan na nos isla i partnernan turístiko topa hopi kontakto komersial potensial (nobo) i krea partnershipnan ku por yuda stimulá turismo na Boneiru i ku por kondusí na oportunidatnan nobo.


Dia 27 i 28 di sèptèmber TCB ta organisá su di tres Bonaire Tourism Summit anual, ku e tema: ‘Preservashon di nos prendanan skondí’, ku komo meta pa trese nos stakeholdernan turístiko aktivo huntu pa papia tokante futuro di nos isla, branding, konekshon aéreo, merkadeo, strategianan di relashonnan públiko i e último desaroyonan i trèntnan den e sektor. Ku oradornan ‘keynote’ i oradornan invitá, meta di e Bonaire Tourism Summit ta pa sektor turístiko na Boneiru ku tur medio posibel ‘subi bai na e siguiente nivel’, pa sigui ofresé i promové e karakterístikanan úniko di nos isla.


For di 28 di sèptèmber te 1 di òktober Bonaire Hotel and Tourism Association i TCB, den kolaborashon ku e proveedor di edukashon di biña i sertifikashon WTOL Academy i Stichting Vakbekwaamheid Horeca (SVH) ta organisá e promé Siman di Biña Boneiru, ku komo meta pa mustra e rikesa i diversidat di e industria di biña i promové Boneiru komo un destinashon prominente pa turismo di biña.


E aktividatnan di e Luna di Turismo ta kulminá riba djasabra 30 di sèptèmber durante e evento Taste of Bonaire ku e tema Turismo, un tema ku ta enfoká riba turismo i nos hóbennan.

BròKèS 93.5 ………… Skuch’é!

3 views

Bình luận


BROKES 93.5 - Mas i Mas ta skuch'e

Kontakto

Buskando mas informashon?
Tuma kontakto ku nos awe mes.

STUDIO; +599 701 0935

Djòni Leoneta; +599 786 9091

Ethel Leoneta; +599 796 9133

Djaluna pa djabièrnè

8or di mainta pa 6or di atardi

  • Instagram
  • YouTube
  • Facebook

Danki pa komunuika ku nos!

Nos Klientenan Felis

"Add a testimonial that a happy customer or client has said about working with you."

Amanda Johns, COO, HORIZON

Diamonds Music Logo.jpg
mcb.png
Untitled_edited.jpg
Logo - My Eye Optical.jpg
Bashi.png
bottom of page