Boneiru ku tremendo presentashon durante Orlando Fashion Kids

Boneiru tabata tin un tremendo presentashon durante Orlando Fashion Kids ku partisipashon di Nishanthalie Molina i Khloe Obersi.

Orlando Fashion Kids ta un evento grandi ku a keda organisá na Orlando, Florida, Estados Unidos, di 3 pa 7 di Mei i a brinda un plataforma pa muchanan di tur parti di mundu por a mustra nan talento riba tereno di pasarela i modelahe. Esaki tabata un oportunidat grandi i un eksperensha úniko pa nos muchanan. Durante e enkuentronan tambe nan por a sera konosí I logra amistat ku otro muchanan ku tin e mesun pashon.

Aparte di modelá, faktornan manera disiplina I komunikashon ta hunga un rol grandi, loke ta algu hopi balioso den e muchanan desaroyo.

Riba invitashon nos briyante talentonan di Boneiru Nishanthalie Molina i Khloe Obersi tambe a partisipá na e gran evento aki i nan a sa di demostrá nan habilidatnan riba pasarela, modelando for di un kolekshon di trahenan bunita, kreativo i fashionabel di diferente diseñado di moda for di diferente pais. E presentashon di nos muchanan tabata tremendo i impreshonante durante Orlando Fashion Kids, apesar ku tabata nan promé biaha riba pasarela internashonal.

Mayornan i famia ta sumamente satisfecho i orguyoso ku nan por a realisá e biahe aki i ta felisitá Nishanthalie i Khloe pa nan tremendo prestashon.

Un danki di kurason na tur e mentornan pa nan trabou duro i dedikashon pa entrená i prepará nan pa asina nan soño i nan deseo por a bira realidat. Danki tambe na tur ku a sostené nos muchanan ku bunita mensahe i deseonan, esaki tabata un estímulo grandi pa nan.

Ta evidente ku nos isla chikitu Boneiru tin hopi talento i potenshal, tambe riba tereno di modelahe i pasarela.

Ojalá nos gobernantenan por pensa mas den direkshon di duna aporte na momento di partipasipashon di nos muchanan na tipo di eventonan asina ku sin duda ta duna Boneiru su nomber un realse riba nivel internashonal.

BròKèS 93.5 ………… Skuch’é!