Aktualmente mundu ta eksperensiando un blikiamentu di koral ku a plama tur kaminda, e di dos blikiamentu mundial di e dékada akí, di kua ekspertonan di National Oceanic and Atmospheric Administration (NOAA) i International Coral Reef Initiative (ICRI) ta pronostiká ku esaki lo por ta mas grave ku esun di aña pasá.
E ripitishon di blikiamentu ku un semehante intensidat i frekuensia ta suprayá e desafio kontinuo di kambio di klima i impakto di esaki riba biodiversidat marino den área di Karibe (Hulandes) i pafó di esaki.
Komprondé blikiamentu di koral; Blikiamentu di koral ta un fenómeno ku ta afektá ekosistemanan marino rònt mundu i ku ta keda okashoná pa faktornan di strès, manera fluktuashon di temperatura, variashon di lus òf kambio den nivel di nutriente.
Bou di e sirkunstansianan ekstremo akí, e koralnan ta ekspulsá e alganan simbiótiko ku ta biba den nan tehidonan, loke ta kondusí na pèrdida di koló i vitalidat. Aunke ku koral blikiá no ta direktamente mortal, e ta bira sí mas suseptibel pa mortalidat bou di strès ku ta mas intenso i ku ta dura hopi tempu.
E kaso di blikiamentu di aña pasá, kompará ku e aña akí; Den añanan anterior refnan di koral tabata eksperensiá blikiamentu grave komo konsekuensia di temperatura inusualmente kayente di oséano. E aña akí e situashon ta parse di a bira mas grave ainda, kaminda a registrá temperaturanan mas haltu ainda, loke ta indiká un impakto ku ta posibelmente mas grave ainda pa salú di koral i indikando tambe ku e blikiamentu ta mas grandi i ekspansivo ainda.
E strès aktual di temperatura ya ta andando, aunke tin algun koral ku no a rekuperá nan koló maròn kompletamente bèk, despues di e suseso di aña pasá.
.png)
Comments