BISHITA DI TRABOU DI DELEGASHON DI PARLAMENTO HULANDES RELASHONÁ KU NATURALESA, KAS PA PUEBLO I SOSTENIBILISASHON
Durante e último dianan, for di 25 te ku 27 di febrüari, un delegashon di Parlamento hulandes (Staten-Generaal) tabata na Boneiru ku un bishita di trabou. E delegashon di Parlamento hulandes di e komishonnan fiho pa Relashonnan den Reino, ku ta konsistí di miembronan di Tweede i Eerste Kamer, durante e bishita akí a papia ku Diálogo Sentral i ku Arxen Alders (mènedjer di programa di e Plan di Maneho pa Naturalesa i Medio Ambiente), Joselito Statia (mènedjer di proyekto di e programa di kaminda) i Sabine Engel (Mangrobe Maniacs) tokante naturalesa, kas pa pueblo i sostenibilisashon.
Puntonan di lansa importante den e kòmbersashonnan akí tabata e problemanan relashoná ku maneho di awa, e puntonan natural di salida i kaptashon di awa, protekshon di kosta den relashon ku e superfisie di laman ku ta subi, sostenibilisashon pa medio di maneho di awa, protekshon di palu di mangel, influensia di eroshon riba Ramsar (áreanan húmedo) i e menasa di sargassum pa naturalesa. Banda di e hopi tópikonan tokante naturalesa, sostenibilisashon i konsekuensia di kambio di klima, a papia hopi tambe tokante bibienda. Den kolaborashon ku Fundashon Cas Boneriano e delegashon por a mira kuantu esfuerso ta hasiendo awor akí pa sòru pa lugá di biba pa gruponan vulnerabel i spesífikamente e proyektonan di konstrukshon di kas ku ta sòru pa bibienda sosial nobo i mas mihó. Ta trata di konstrukshon nobo, renobashon i e esfuerso ku ta hasi pa mihó bibienda.
E bishita di trabou a kuminsá ku un ‘walking dinner’ ku gezaghèber, miembronan di Kolegio Ehekutivo i miembronan di Konseho Insular. E siguiente dianan di e bishita di trabou a konsistí di diferente parti di programa kaminda e puntonan menshoná akí riba a bini dilanti, kuminsando ku presentashon di e Plan di Maneho pa Naturalesa i Medio Ambiente, un rekorido tokante awa, inundashon, maneho di shushi, un rekorido tokante kas pa pueblo i un rekorido tokante klima i sostenibilisashon.
Durante e rekorido tokante klima i sostenibilisashon a hasi diferente parada atraves di henter nos isla. Por ehèmpel na e dam di Mona Pasashi i na ‘Degraded Mangroves Lac Bay’ nan a tira un bista riba pèrdida di vegetashon, e parti mas ariba di suela, krio sostenibel di kabritu, influensia riba awa den suela, mondi di palu di mangel, ref di koral, influensia di eroshon, salinisashon i pérdida di palu di mangel. E di dos parada tabata na Punta Kalbas, e mondi históriko di palu di mangel, i ‘Lac Ramsar Site’ ku ta di balor kultural históriko pa ekonomia i turismo. Na e punto di ekstrakshon di sargassum a para un ratu pa laga e delegashon haña un bista di e forma kon sargassum ta menasá naturalesa i di e problemátika tokante eliminashon di sargassum. Tambe nan por a mira nos kosta pariba ku tur su desafionan pa motibu di subida di superfisie di laman ku e aksesibilidat na Pekelmeer i e ‘Ramsar Site’, ku nan a habri na aña 1986 ku su sitio kaminda flamingo ta brui.
Esaki ta djis algun di e partinan di e programa durante e bishita di trabou di tres dia ku a laga hopi impreshon i komprondementu atras serka e delegashon. Resultado di esaki ta ku den futuro Boneiru por sigui elaborá riba e informashonnan ku e delegashon a optené. Den kombinashon ku ‘midimentu ta konosementu’, i ku e maneho korekto di informashon na Hulanda, ku nan sosten Boneiru por traha riba solushonnan konstruktivo.
Delegashon di Parlamento hulandes, konsistiendo di:
Miembronan di Tweede Kamer
1. Mariëlle Paul (delegatieleider, VVD)
2. Roelien Kamminga (VVD)
3. Jorien Wuite (D66)
4. Habtamu de Hoop (PvdA)
5. Kauthar Bouchallikh (GroenLinks)
6. Liane den Haan (Fractie Den Haan)
7. Sylvana Simons (BIJ1)
8. Tim de Lange (grefir)
Miembronan di Eerste Kamer
1. Paul Rosenmöller (vise lider di delegashon, GroenLinks)
2. Annemarie Jorritsma-Lebbink (VVD)
3. Ria Oomen-Ruijten (CDA)
4. Jeroen Recourt (PvdA)
5. Peter Nicolai (PvdD)
6. Fred Bergman (grefir)
===========================================
BròKèS 93.5 ………… Skuch’é!
.png)
Comments