![](https://static.wixstatic.com/media/e334c0_8000296080a0421880895b749180ab6a~mv2.png/v1/fill/w_980,h_735,al_c,q_90,usm_0.66_1.00_0.01,enc_auto/e334c0_8000296080a0421880895b749180ab6a~mv2.png)
Na kuminsamentu di aña mi mester a hiba tres tènt na Posada Para Mira na Rincon, kaminda nan lo mester tabatin un marshe pa turista. Masha dia mi ta mek pa kumpra un trùk pero ora tabata tin na bendeó "Yvonne" na Kaya Industria, mi a keda mensha te tur a kaba. Awe ta djadumingu i m’a pensa ku lo mi haña un trùk fásil pa hiba e tèntnan Rincon. Mi a bai wak serka Freek pero e trùk no tabata tei. Mi a bai wak serka Miguel pero di dje tabata yen di sushi pa hiba Landfiil. M’a pensa riba Sergio i mi a bai Tera Corra. No tabata tin niun hende na kas. Mi a kore rònt wak si mi por a haña un hende pero nèt e oranan ei bo no ta haña niun hende.
Ora tabata bai i banda di 2or mi a bolbe bai Tera Corra bai wak Sergio. Ora m’a drenta su hanchi mi a mira su trùk pará, pero e tabata tin yen kos den baki. M’a pita i mesora Sergio a sali , m’a puntr’é si e por yudami hiba tres tènt di marshe, Rincon. Sergio ta un hende semper komplasiente, e di "si" Onnie ki ora? E di kumi ku su trùk ta yen di koper bieu i e tin un par di bateria pisá aden, pero tres tènt e ta pone nan ariba. Ora mi a wak e truk bon, e trùk tabata lata lata di kos pero mi no ta tin otro opshon. Mi di ku Sergio topami na Selibon pa nos kue tres tènt.
Mi a kore bai Selibon bai ward’é. 15 minüt a pasa nada di Sergio, mi a baha kue seis pia di tènt pone kla pa ora Sergio yega. Despues di un ratu m’a mira Sergio ta bin pero e trùk tabata kore forsá. Sergio a yega para i nos a hinka e tèntnan aden, mi a laga mi outo keda eibou i nos a kohe rumbo pa Rincon.
Nos a sali i mi a ripará ku Sergio mester a pasa spit kada bes, debí ku e trùk tabata pisá. Nos a pasa Antriol i Norti Saliña, i nos a kue direkshon di Tra’i Montaña. Mas nos bai nort mi a kuminsá puntra mi mes, riba kaminda règt mes e trùk no ke kue spit bon, kon ta para na subi di Trai Montaña? Sergio mes kontentu di dje, ta kontami kiko e ta hasi. Pero kada bes e trùk tabata pèrdè velosidat i un fila di outo a forma nos tras. Nos a baha den e klof pa bai subi Seru largu na pos di Gurubu sin problema. Mi a tira un orashon pidi Dios ku nos por subi e seru. Nos a kuminsá subi, lugá e trùk kue spit e tabata pèrdè velosidat.
Nos a kuminsá subi i Sergio a keda pasa di spit, di 2 pa 1, despues pa dos, e trùk a kuminsá sagudí den kabes di seru, el a hink’é den 1, dera gas pero nada e trùk tabata kasi pará, Sergio a hinka klòch un biaha mas aden, res e motor despues laga klòch bai, e trùk a keda burdugá, keha, yora, snek kasi sukumbí den e kabes di seru. Nèt e momentu ei ‘grasia na Dios’ ku Sergio a haña un espasio kantu di kaminda pa para e trùk, pasó henter e subida, kantu di kaminda bo no por para, komo tin yen di rama. Pa kolmo nèt na e hanchi ku tin na man drechi ei den kabes di seru, el a kore pas’é.
Nèt na último sekònde Sergio a haña un espasio kaminda ántes tabata koba kalichi, el a para e trùk kantu di kaminda. Den e sekòndenan ei mi den mi tripanan tabata tody tody, mi kurason a stòp di bati i mi a sinti’é te den mi korokoro. E fila di outo ku a ripará kuantu trabou ta kosta e trùk pa subi e seru a keda na un distansia tras di nos.
Awor Sergio mester a res e motor pero ku e peso ku nos ta tin, hantrèm no kier a wanta.
El a ranka e hantrèm, pero manera e kita su pia fo’i brek pa hinka e klòch aden, pa e res e motor, nos ta kuminsá kore bai patras. Sergio a bira wak mi ku un `kara hari, i bisami "trankilo Onnie no spanta’, ta djis mi mester res e motor pa nos subi. Kon ku el a hasi, res e motor un par di bes i nos a kana subi e seru sin problema.
Bayendo Rincon mi a kuminsa pensa na unda mas tin seru ku nos por haña nos ku problema, danki Dios no ta tin mas subida na kaminda di Rincon, ta bahada so ta tin. Asina nos a sigi bai Rincon, pasando spit kada bes ku e trùk pèrdè velosidat.
Nos a yega Rincon i nos a drenta Kaya Paramira i mi a mira e serunan nos dilanti. Na e seritu chikí pabou di kas di Demetio Frans i Priska ya kaba e trùk no kier a subi. Nos a lucha sigui bai pabou i Sergio a kuminsá duna spit pa nos subi e seru di Posada Para Mira.
Ya ami, a tira seis Ave Maria i sinku ‘Pidi pa El’, pa nada no pasa nos. E trùk ta tin bon spit i nos a kuminsá subi e seru, nèt e ora ei e vèn di Posada a pita nos i kore pasa bai, na masomenos 200 meter el a drenta e hanchi bai Posada na man robes.
E kaminda pa subi e seru tabata largu i nos a kuminsá pèrdè velosidat. Sergio a drei wak mi, mi ke sa el a mira e spantu ku mi ta tin i el a hari bisami "trankilo Onnie" nos a yega kaba. Nos tabata práktikamente den e kabes di seru. E no kaba bisa e ko’i, ku e trùk a bolbe kuminsá sagudí, velosidat a baha, Sergio a dal’e den 1, e trùk a kuminsá kana, pero e no ta por, el a pusha klòtch aden, res, pero nèt e ora ei e trùk a paga.
Sergio a bula hinka klòch ku brek pero e trùk a kuminsá bai patras duru. Mi di até: ‘Adios Mundo’ E trùk a bai abou duru, m’a mira Sergio su pia riba brek pero nada. Sergio a bira wak patras, djei a drei e trùk ku e parti patras a drenta mondi. M’a tende yen di krakmentu di palu, e trùk a dal wanta den un kos pasó mi a keda bentá den banda di e shoufer, danki Dios mi ta den seatbelt, e truk a keda tur di banda.
Despues dor di e bentana di Sergio un rama di palu a bin paden. Djei a reina un silensio. Den mi banda m’a tende Sergio a puntrami ‘Onnie tur kos ta bon?’ Mi di kune "si". Djei mi a habri e porta i bula abou. Ora mi a sali mi a mira ku nos a dal wanta den un pal’i kuihi i e porta di Sergio a keda pegá den un palu di oliba. Sergio mester a baha di e banda di pasahero pasó e no por a habri su porta. Nos a skapa na wowo di angua, pasó si nos no a wanta riba e pal’i kuihi, nos lo a sigui bai abou den un ravein.
Un pikòp nèt tabata sali fo’i Posada i a ofresé pa trèk nos saka afó, pero e situashon tabata peligroso pasó e baterianan tabata nèt e banda mas abou i e chèns tabata grandi ku e trùk e por bòltu. Asina mes nos a purba pa rank’é, e pikop a trèk, asta lanta riba dos wil pero e trùk a ni muf. A disidí pa yama Lee Polis, pa wak ku su pikòp, sí por a ranka e trùk saka.
Tanten Sergio tabata buska un manera pa saka e trùk, ami a baha e tèntnan i karga hiba Posada. Despues di mei ora Lee a yega wak e situashon i bisami, Onnie bèl takelwagen laga nan bin his’é sino e trùk ta bòltu. Pa bèl takelwagen i pa e yega Rincon a dura un ora. Ora e takelwagen a yega i despues di vários biaha purba, nan a bin logra sak’é. M’a paga e takelwagen i ami ku Sergio a pone kabes pa Playa. Nos tabata kòmbèrsá i tabata komentá kiko nos a pasa aden te ora nos a yega Subí di Colombia.
Nos a kue bon spit biniendo di Arowak pero mas nos subi e seru velosidat tabata baha. Sergio atrobe ta kambia spit di dos bai unu, nèt nos ta yegando e tòp, m’a sinti ku e trùk a sigui pèrdè velosidat pero nèt ora nos tabata bai yega e tòp, Sergio a hala e trùk pone na banda. Mi di at’é "pompamentu atrobe, e biaha aki si mi ta den mi fita. M’a skapa e promé biaha, awoki si ta den mi pepe mi ta.
Nèt m’a drei wak Sergio, pa puntr’é kiko? Un outo di polis ku un ambulans su tras a bula pasa nos ku sirena i spit haltu bai direkshon di Playa. Lugá Sergio a wak e outo di polis den spil ta bin su tras ku sirena lus blou, el a hala para na kantu pa e polis ku ambulans pasa.
E momentu ei ku el a hala e trùk para na banda mi a sinti tur kos un biaha mas. E trùk a bai atras, m’a mira Sergio bula ku tur dos pia riba klòch ku brek i nos a kuminsa bai duru atras, mi a kue e handvat tene duru sinti kon e baki ta swing bèk dal den un palu, m’a tende sonido di palu ku heru ta raska, kon e ramanan a drenta paden, kon e trùk a kèntel den banda i e holó di pal’i kuihi, holó di gasoil i e huma di e trùk, despues e silensio. Un biaha mas mi a tende i wak Sergio ku smile riba su kara puntrami "Onnie tur kos ta bon?" Mi di kuné si i nos a kore henter e kaminda di Rincon sin problema bai Selibon.
Aya mi a gradisi’é, pag’é i kana bai mi outo.
Kanando ta bai outo, ku mi wowonan yen di awa, mi a hisa mi kabes wak shelu bisa: "Tata danki pa a kuida bo yu un biaha mas"
===========================================
BròKèS 93.5 ………… Skuch’é!
Comments