Logrando un empate 2 - 2 den e ultimo minütnan di wega,
Atlétiko Flamingo ‘United Girls’ ta titulá kampion 2022 – 2023 di Futbòl Kategoria Dama
Djasabra último 20 di mei den Stadion Antonio Trenidat, tabatin e di dos wega di playoff final di futbòl di dama pa lokual ta trata Kampionato 2022 – 2023 di Boneiru, esaki entre e ekiponan Atlétiko Flamingo ‘United Girls’ i Atlétiko Tera Corra ‘Girls ATC’.
Manera ta konosí den e promé wega final, tabata Atlétiko Flamingo ku a gana e enkuentro ku e skor 3 – 1 i komo ta trata di un seri ‘mihó di tres’, un empate lo tabata sufisiente pa e ekipo Flamingo titulá kampion di Kampionato 2022 – 2023 di futbòl kategoria dama.
Tabata hustamente logrando un empate den e ultimo minütnan di e wega, ku djasabra último Atlétiko Flamingo ta titulá kampion.
Despues di tabata tras 2 – 0, e ekipo bou di direkshon di Alexis Bloem a reakshoná fuertemente i ta skor na dos okashon, esaki faltando masomenos 10 minüt pa e partido finalisá.
Ku e resultado aki o sea un empate 2 – 2, Atlétiko Flamingo ‘United Girls’ no solamente a bira kampion di Kampionato 2022 – 2023 di Federashon Futbòl Boneriano, sino tambe e promé kampion den kategoria di futbòl di dama aki na Boneiru. Pabien!
BròKèS 93.5 ………… Skuch’é!
.png)
