
ASOTEKO ta hopi desapuntá. A papia ku diferente partido, pero NIUN no ta tuma un posishon kla. Lo mínimo ku polítikonan por a hasi ta pa sigurá ASOTEKO ku e hendenan riba Lista di Espera lo haña nan tereno a base di e reglanan aktual. Anto dentro di un aña. Pero nada di esei. Palabra so, NADA konkreto. Politikeria manera semper.
Pues nos no por verwagt NADA di e elekshon aki. Ta Korte so por skapa e +/- 1.500 persona riba Lista di Espera pa haña tereno. ASOTEKO lo apelá e kaso y lo NO duna konseho di voto pa niun partido. Kisas votadónan por konsiderá pa vota pa un partido radikal e biaha aki. No pasobra bo ta di akuerdo ku tur nan punto, pero djis komo protesta.
Ounke nos no ta duna niun konseho di voto pa niun partido, nos lo no ta sinsero si nos keda sin menshoná diputado James Kroon di UPB. E tabata e úniko polítiko ku a toma kontakto ku nos. Nos a akordá un teksto kuné di un Akuerdo Amikal pa terminá e kaso ku ASOTEKO a lanta. Dip. Kroon a lanta un ekspektativa grandi bou di miembronan di ASOTEKO y tur esnan riba Lista di Espera. Pero UPB y dip. Kroon NO a kumpli. Tur hende saka su propio sòm.
Por lesa e Konsepto di e Akuerdo aki: https://www.arcocarib.com/assets/uploads/court_cases/ASOTEKO_Tekst_Schikking_tweede_versie.pdf Kòrda bon, e NO a keda firmá y ta p’esei ASOTEKO lo apelá e kaso.
For di e kombersashonnan ku e polítikonan ku nos a papia kuné (di UPB, MPB, M21 y PDB) nos ta saka e konklushon ku TUR partido a disidí kaba pa bai pa kambionan drástiko di e Maneho di Tereno. Segun nos a saka afó, e sistema aktual di duna tereno pa hende konstruí nan propio kas riba dje, lo wòrdu di skrap kompletamente. En bes di esei, lo bo tin ku KUMPRA tereno den futuro pa un preis di alrededor di $ 20.000.- plùs gastu pa midi tereno, gastu pa notario y leges.
Y kisas riba dje tambe pa gastu di haña awa, lus y internèt te na bo kas, un otro $ 5,000.- nei.
Dor ku e polítikonan no a papia palabra kla, nos no por tin sigur over di esaki. Pero esei ta e impreshon fuerte ku nos a haña. Ku otro palabra, den futuro hende pober lo NO haña un tereno ‘gratis’ di gobièrnu mas pa traha nan propio kas riba dje manera ántes.
Ban wak si ASOTEKO lo haña rason. ASOTEKO lo pidi Korte Superior (‘Hof van Justitie’) pa sikiera respetá e hendenan ku a pidi tereno kaba. Es desir, pa sikiera NAN lo haña un tereno ‘gratis’ basá riba e sistema di ántes (ta paga pa notario, leges y pa midi tereno so). ASOTEKO no por pidi Korte nada mas, pasobra al final de la cuenta nos ta biba den un demokrasia. Pueblo ta haña loke nan a vota pe. Si pueblo no ta vota konsiente, ta un gobièrnu inkonsiente nos ta haña.
===========================================
BròKèS 93.5 ………… Skuch’é!
Comments