Analisashon di Korant NOBO- BONEIRU ~ Pantaya Polítiko Boneriano

E analisashon ku Nobo Boneiru a hasi pa loke ta trata e pantaya polítiko na Boneiru a kai manera un bòm. Hopi reakshon positivo a drenta i tambe apresio pa ku e manera ku Nobo Boneiru ta desmáskará politítikonan ku a huramentá ku nan lo no a risibí ni lo a aseptá, ni lo no aseptá, ni direkta- ni indirektamente, ningun regalo ni ningun promesa di hasi algu o laga di hasi algu den e kargo o funshon ku nan tin.

Nan a hura ku lo ta fiel na e Konstitushon, ku nan lo kumpli ku lei i ku lo nan kumpli ku nan obligashonnan sea ta komo miembro di konseho insular òf miembro di konseho ehekutivo, segun nan konsenshi i honor.

Den nos analisashon anterior Nobo Boneiru a mustra bon kla ku e ponensianan di tantu konsehal Vrolijk i konsehal Crestian pa loke ta trata eks diputado Thielman no ta kuadra ku bèrdat. Nan a tilda e ex diputado aki di a kometé un hecho robes pa loke ta trata e presupuesto 2022 pero simplemente e kolegio di e tempu ei a ehekutá e presupuesto manera aprobá dor di konseho insular di e tempu ei.

Ta den 2023 e akountènt, apuntá pa e mesún konseho insular, a rekomendá pa no plama e gastunan di areglo si seniornan riba mas aña pero pone e gastunan total den un solo aña. Awor ta ken ta bai argumentá ku e akountènt ku ta kontrolá bo bukinan pa wak si tur kos ta kuadra? Anto pa kolmo a aprobá e kuentanan anual di 2022 pa promé biaha den historia di Boneiru, sea e tempu ei komo teritorio insular i awor komo entidat públiko di Boneiru.  Ta un hende so Nobo Boneiru konosé ku lo a bai diskutí ku e akountènt i esei no ta nada mas i nada menos e aktual diputado di desaster finansiero ku ta Clark Abraham. Pero eks diputado Thielman ku ta riba nivel di HBO, konforme WolBES a proponé un desishon di indemnisashon konforme lei finanasiero BES, òf manera nan ta yam’é FinBES i a regla e kos atministrativamente konforme lei. Pasobra ta netamente pa esei eks diputado Thielman a huramentá p’é, esta di kumpli ku lei i kumpli ku su obligashonnan.

Un miembro di konseho insular no mag gaña. Integridat, honestidat i transparensia ta balornan esensial pa representantenan di pueblo. Mentira di un miembro di konseho insular ta kondusí na pèrdida di konfiansa di e pueblo boneriano, i por sierto tambe di minister i sekretarionan di estado na Hulanda i otro miembronan di konseho insular. Nobo Boneriano ta puntra si e konsehalnan en kuestion no ta konsiente ku awendia no por saka pamfletanan mas estilo di añanan setenta i susha nòmber di eks mandatarionan i otronan? Ta asina siegu nan ta ku ta sigui òrdu di lider ounke esei nifiká ku nan ta kòrta nan mes nanishi i pio ainda mancha nòmber di nan famia?

Nobo Boneiru a primintí di sigui analisá e pamfletanan ku konsehalnan Vrolijk i Crestian a saka siman pasá.

Pero tin un batata kayente riba mesa ku yama Miles Mercera, direktor saliente di ofisina di turismo. Miles a yega Boneiru i den un tempu rekòrt, inkluso e periodo difísil di covid, a sa di promové Boneiru na un manera inovativo, úniko i dinámiko i e kos a kai manera un bòm ora el a anunsiá ku e ta tuma su retiru pa asina e por tin mas tempu pa su famia.

Esnan ku ta komproné papiamentu polítiko ya a komprondé bon bon di unda e bientu ta supla. Atrobe ta e diputado di frakaso finansiero ku ta Clark Abraham a iritá Miles Mercera di tal grado ku el a disidí di bati retirada pasobra simplemente ku su eksperensia i edukashon akadémiko, e no mester keda lembe un hende manera e diputado di frakaso finansiero ku tin muchu ménos estudio kuné.

Partido MPB a tradusí e papiamentu polítiko i a poné den un papiamentu brutu i simpel pa tur hende komprondé, ku ta e diputado di frakaso finansiero a kore ku e hòmber. Nobo Boneiru ta puntra su mes, na unda UPB a keda. N’ ta UPB tabata huntu ku MPB e tempu ei?

No a dura muchu ku e krachinan a reakshoná pero e biaha aki nan no a instruí nan miembronan di konseho insular pero a laga Tati Frans bai saka e kastañanan for di den kandela asesorá pa Noël Janga. Básikamente nan ponensia ta ku Miles a solisitá kaba pa un trabou nobo na Kòrsou promé ku e gobièrnu aktual a sinta, pues no por ta posibel ku ta e diputado di frakaso finansiero a kore ku e hòmber.

Nobo Boneiru sí a hasi su huiswèrk i gustosamente por aklará un ke otro pa pueblo sa di unda e bientu ta supla.

E komishon di selekshon pa un direktor nobo di CINEX na Kòrsou dia 30 di novèmber a papia ku e minister di MEO pa deliberá e kambio proponé den e atvertensia pa e direktor di ‘academisch opleiding’ pa ‘academisch- werk en denkniveau’. Dia 12 di yanüari 2024 e hunta di komisario di CINEX a reuní ku e konsehero Deloite i den e reunion ei a disidí pa bai di akuerdo ku e kambio ariba menshoná i alargá e periodo di solisitut di 15 di yanüari 2024 te ku 29 di yanüari 2024.

Miles Mercera fadá kaba ku e diputado di frakaso finansiero no a pèrdè pa gana i a hisa buta i pa Boneiru su mala suerte, pero pa suerte di Miles Mercera mes, nan skohé komo e próksimo direktor di CINEX.

Nobo Boneiru ta e promé den e notisia i aki no tin fayo. Esaki ta e bèrdat.