Tourism Corporation Bonaire den kolaborashon ku Bonaire International Airport (BIA)
i BONHATA ta kontentu di por anunsiá ku American Airlines ta bai amplia su ruta di Miami pa Boneiru konsiderabelmente.
For di 5 di desèmber 2024 American Airlines ta bai 'upgrade' su aktual tres buelonan pa siman den wenter, i bini ku un skema nobo diario, kaminda nan lo hasi uso di un avion Boeing 737. Banda di esaki e kompania di aviashon for di 7 di desèmber 2024 ta bai ofresé dos buelo riba djasabra, loke ta resultá den ocho buelo pa siman.
E ampliashon di buelo akí, ku lo dura te ku 4 di mei 2025, ta un impulso importante pa Boneiru su konektividat. Esaki lo aliviá e nesesidat pa konekshon dòbel i oumentá disponibilidat di asiento pa biaha entre e islanan, mehorando asina e eksperensia di biahe den su totalidat pa bishitantenan i pa nos poblashon lokal.
"E oumento den buelo akí ta un 'game changer' pa Boneiru i e ta ofresé mas komodidat i aksesibilidat pa biaheronan. Nos ta kontentu di por yama bon biní na nos bishitantenan na nos isla", segun Miles Mercera, direktor di Tourism Corporation Bonaire.
"Pa hopi tempu kaba American Airlines ta nos partner i awor nan ta ofresé konekshonnan diario pa Nort-Amérika via e 'Miami gateway', loke ta nifiká mas eskoho pa biaheronan. E di dos buelo riba djasabra ta planiá pa mas lat atardi, despues di e oranan di mas drùk", segun Maarten van der Scheer, direktor di Aeropuerto Flamingo. Na esaki el a añadí: "Mas buelo direkto ta nifiká ménos nesesidat pa biaha via e otro islanan".
Comments