Tourism Corporation Bonaire ta sostené e intento na luna di mart den e paradiso mundial di buseo na kosta
Tourism Corporation Bonaire (TCB) ta sostené e intento pa Freediving World Record 2023 ku ta bai tuma lugá for di 27 te ku 29 di mart na nos isla. E kampion rusiano di freediving Alexey Molchanov, ku ke kibra e rekòr aktual via e organisashon ofisial di freediving ‘International Association for the Development of Apnea (AIDA)’, lo representá Servia i e bandera internashonal den su intento.
Molchanov, ku den komunidat di buseo ta konosí komo ‘The Machine’ i tambe komo e freediver ku mas kurashi den historia, tin kustumber di kibra rekòr for di tempu ku e tabatin 5 aña. Aktualmente Molchanov ta disponé di e rekòr mundial di freediving den e disiplina Constant Weight (CWT) na 426 pia. E aña akí na Boneiru e atleta ta bai purba kibra e rekòr aktual di 492 pia den e disiplina di Variable Weight (VWT), ku aktualmente ta den man di e freediver Walid Boudhiaf. Paralelo na e intento pa rekòr mundial akí, algun di e mihó freedivernan hulandes (miembronan di Dutch Freediving Association) ta bai purba kibra algun rekòr nashonal den e bahia blou di Kralendijk.
‘Nos mundu bou di laman protehá i birgen ta ofresé e mihó esenario pa e hazaña di freediving akí’, segun Miles Mercera, direktor di TCB. ‘Nos ta kontentu ku nos por yama Alexey i otronan ku ta en buska di aventura bon biní den e paradiso ekológiko ku Boneiru ta i ku nos por mustra e promé Blue Destination na mundu komo un parke di hunga di promé kalidat, tantu riba komo bou di superfisie di laman.’
AIDA ta e organisadó mas grandi di kompetensia internashonal di freediving. Nan mishon ta pa mustra mundu ku e deporte akí ta seif, dibertido i desafiante i ku e ta un meskla fantástiko di trankilidat interno, konsentrashon i trabou den tim. Nos isla ta implementá algun protokòl pa salbaguardá siguridat optimal durante e intento, ku medidanan manera un sistema di kontrabalaster i un ambulans ku ta para ‘stand by’ pa garantisá e mihó ambiente posibel pa e intento akí.
===========================================
BròKèS 93.5 ………… Skuch’é!
.png)
Comentarios