Ace Kids Club a habri inskripshon pa e proyekto festival di obranan kòrtiku pa muchanan

Ace Kids Club lo kuminsa ku su periodo nobo di lesnan di drama pa muchanan di 5 pa 10 aña di edat huntu ku algun drama coaches.

Ace Kids Club ta un skol di arte ku ta bou di maneho di “Art Culture Education Foundation”. Un fundashon ku tin komo meta promove Arte, Kultura i Edukashon na Boneiru via di proyektonan edukativo riba e tereno di músika, baile, teatro, arte plástiko, arte visual i muchu mas.

Entre 2020 pa 2023 ACE Foundation a traha riba diferente proyektonan edukativo entre otro e obranan teatral manera “Palu di Kuenta” i “Palu di Kuenta ta konta di Kompa Nanzi”. Aparte di e diferente presentashonan i videoclipnan ku ACE Foundation a produsí nos tabatin e proyekto di “Drama Coaches” un curso intensivo pa krea drama coaches pa asina sigui promove arte i kultura aki na Boneiru. Un total di 10 drama coaches a finalisá nan curso ku eksito i pronto nan lo tin nan propio produkshon “Festival di obranan kòrtiku” huntu ku ACE Foundation bou di guia di Lilimar Valencia.

Pa e motibu aki a habri inskripshon pa muchanan entre 5 pa 10 aña pa por forma parti di e “Festival di obranan kòrtiku”. Kada coach tin e tarea di krea nan obra teatral di mas o menos 10 minüt i lo traha ku un grupo di mucha di ACE Kids Club. Inskripshon a habri i ta sera dia 23 di september proksimo.

Por kuminsa inskribi via di acesbonaire@gmail.com pa mas informashon por tuma kontakto ku nos via e siguiente medionan. Telefon +599 790 0155, facebook page: ACE Bonaire, instagram: @acebonaire i nos website www.acesbonaire.org .

BròKèS 93.5 ………… Skuch’é!