A sera Dia Mundial di Alzhemer di un manera festivo

A sera Dia Mundial di Alzhemer, djaweps 21 di sèptèmber, di un manera festivo ku presentashon di kanto na Captain Don’s Habitat. Nuebe bishitante di akohida den dia/kas di kuido na Boneiru, representando tur bario na Boneiru, a trese nan “Kansionnan ku nos no por lubidá” pa nan miembronan di famia invitá, bou di guia di un kolaboradó den kuido, miéntras un bishitante a deklamá un poema . Sr. Almar Nicolaas, konosido músiko, a kompañá e kantantenan di un manera maestral. Kada bishitante por a trese 6 miembro di famia, huntu ku direktiva i boluntarionan di FAB ku a perkura pa servisio, a sòru pa un sala yen i entusiasmá ku aktivamente a kanta i bati man. Tur hende a gosa di e anochi i di e artistanan kende ku apesar di e echo ku nan ta biba ku demensia, a sa di demostrá nan talento tur ku tin. Kada partisipante a risibí na final di e anochi un bukét di flor i un sertifikado di partisipashon, entregá pa presidente di FAB, Sr. Evert Piar. Organisadónan, miembronan di direktiva i boluntarionan di FAB ta wak bèk riba un klousura eksitoso di e Dia Mundial di Alzheimer e aña akí.

BròKèS 93.5 ………… Skuch’é!